Эн вись
пемыд жырйын ӧзйӧ сись
югыд сись
эн вись
бурдӧдчы
бӧрдны кӧ - бӧрддзы
шуда кӧ - серав
биыс талун оз аснырав
асныралӧ ваыс
ставыс дона
ставыс муса
сӧмын кодзулыд коркӧ кусӧ
ме ог эскы
мый кодзулыд коркӧ кусӧ
сӧстӧм кодзулыд
ыджыд кодзулыд
йӧгзьысь кодзулыд
некор оз кус
оз кус
оз кус
Сола-сола
гулыд гыӧн ылькнитін лолам
ми радейтны полам
тэ радейтны полан
ме радейтны пола
ваыс сола-сола
чужӧмтӧ сотӧ
асылыс чардбиӧн потӧ
регыдӧн югдас
регыдӧн зэрны дугдас
тыдовтчас шондіыс
да діыс
зарни діыс
дзикӧдз вӧйӧм діыс
петкӧдчас
час-мӧд виччысьны да лэдзны
Дона
ӧти борднад он лэбзьы
ме сайӧ дзебсьы
кӧсйӧмыд тӧв паныд кайӧ
кайӧ-кайӧ, оз сетчы
тайӧ серпасыс эз талун чуж
рӧдвуж вын, ыджыд вын
биын эз сотчы да ваӧ эз вӧй
сьӧлӧмӧй нимкодьысла тіпкӧ
лолалӧ-упкӧ, упкӧ
кодкӧ небыдика малыштас лолӧс
быд лун быттьӧ ӧти пӧлӧс серпас
сӧмын медся муса да медся дона
ваймыны она на сет
свет вылас гажаа овны
Чолӧм
ме ӧнӧдз на эг вунӧд тэнӧ
кӧть и када тӧвнырыд венӧ
муслуна путӧ
сьӧлӧмӧй мырдӧн кутӧ-кутӧ
оз лэдз
зэр улын дзикӧдз кӧтасьны-кӧтасьны да садьтӧг усьны
воштысьны некытчӧ
лолыд сотчӧ-сотчӧ
оз кус
бӧрсяньыс гартчӧ тшын-бус
муса автобус
чолӧм
шуда олӧм
Аслыспӧлӧс
гымалан йӧлӧга
стрӧга видзӧдӧны водзлань тӧвъяс
весьтас - матынджык
воштан этшаджык кад
локтан вося гожӧмыс шуда лоӧ?
тэ век гӧгӧрвоан менсьым мӧвпъясӧс
кок туйясӧс ас бӧрся эг коль
смоль сьӧд юрсиа да сьӧд синма вой
а рой тошка пуыд унатор тӧдӧ
мича гӧлӧсыд кольмӧдӧ юрӧс
аслыспӧлӧс
Лэбзяс
сьӧлӧмыд измӧма
дӧзмӧма-дӧзмӧма
видла шонтыны
мед жӧ эськӧ оз пот
доналас-доналас
ловтӧ оз сот
олӧмыслӧн отыс
шензьӧдӧ
гашкӧ ловзяс
гашкӧ небзяс
да выльысь лэбзяс
Кыскӧ
гым-чардӧн пальӧдан
мукӧдӧс жалитан
он асьтӧ
енэжыс пасьтасьӧ
мичаа
кильчӧын сулалӧ
дзоридз доз
косьмас, мусаӧй? оз?
вильшасигмоз
лежнӧг пӧвстӧ усяс асылыс
весиг аслыс оз эскы
муслунтӧг дзескыд
Лэдзны
гырысь войтъяс
эзысь войтъяс
резсисны
дзирдалісны
вӧсни гӧлӧснас норасигмозыс писькӧдчис шорыс
гожӧм шӧрыс кӧдзыд
вадорӧдзыд ылын да матын
другысь койыштісны ва ушатӧн
дрӧгмуніс сьӧлӧмыс
олӧмыс бокиті визувтіс-визувтіс
да ытваӧн кӧтӧдіс
ставсӧ тӧдіс да нинӧм эз тӧд
и тӧдны эз мӧд
ӧта-мӧд
Вӧтын
тэ гашкӧ енэжсянь видзӧдан
сьӧлӧмам олан гашкӧ
тшӧкыда вӧтын волан
ёна колан-колан
пола вунӧдны
чужӧм-мыгӧртӧ
вӧр-ваыс бӧрдӧ
кӧртала-кӧртала
тэнӧ ас бердӧ
кута-кута
ӧтчыд лэдза
лэдза
ог талун
но лэдза
кӧсйыся
лэдза
Шонді
енэжыс усьӧ муас
тэнӧ вошта кӧ
мыйтакӧ радлун
мыйтакӧ шог
ог
гашкӧ ог нин и радейт?
гашкӧ абу нин и муса?
муса
паруса ичӧтик карабӧн
лэба-лэба
тэрыба
воча
и шоча мӧвпала
сӧмын горша
вомтырӧн апала
сынӧдсӧ
юмов сынӧдсӧ
лун-мӧд-коймӧдсӧ ола
ола
ола
Мездыны
кылыд вына
уна радлун вайӧ
да дой
вой улӧ волӧ
вӧрзьӧдлывлӧ
ловзьӧ да кусӧ
нинӧм абусӧ висьтавлӧ мукӧддырйи
синвасӧ чышкалігтырйи
муніс гортас сійӧ
вийӧ да мездӧ
сёрниа би пестӧм
сӧстӧм
талун гашкӧ бурджык овны чӧв
шы ни тӧв
Шонді
тайӧ юсьыс
енэж лӧз юсьыс
васӧ юлім
ловзьылім да кулім
гызян кад
тэнад синмыд
гӧлӧсыд
тэнад
тэнад
бинад кужтӧг вӧдитчим
чим сьӧд эшкынӧн шымыртіс ывласӧ войыс
чӧсӧдана дойыс
сьӧлӧмӧс ёнтӧ
ёнтӧ
ёнтӧ
буракӧ сӧмын шондіыс быдӧнӧс шонтӧ
Матын
тэ йылысь талун
эг мӧвпав
став лэбачыс повзис
да кытчӧкӧ лэбзис
енэжыс ышловзис
гудыр кымӧръясӧн
вевттьысис
шыасин
вӧтын
ме йылысь
эн вунӧд
ме век
матын
татӧн...
Кусас
янсӧдчам
кӧть эськӧ ачым
тӧда
ог аддзысьӧй сэсся некор
эн кор
лолӧй
сыланьӧ лэбзьыны
дыр на кӧсйӧмыс
пондас трачкакывны-ломзьыны
сӧмын
вочасӧн дзикӧдз раммас да кусас
чусалӧ
муса
Тэнад
гожся шондіыс
косьтіс
зэрӧн пӧткӧдчӧм мусӧ
вельмӧм тӧлыс
абусӧ мойдӧ
сійӧ дойдӧ
тэнӧ кывнас
бытшкана кывнас
инас оз ӧшйы
пышъян
пышъян
пышъян
муса вӧрын
зумыд пу сайӧ
дзебсян
висян-висян да
ӧвсян
сьӧлӧмкӧд
тышкасян
кад
тэнад
Бӧр
топыда пӧдлалӧм ӧдзӧс
водзӧссӧ
косӧдӧ олӧмыс
майшасьӧмыс
весьшӧрӧ
ва гуран шӧрӧ
пырис биыс да кусіс
став мусӧ
кытшовтны
да
скӧр гыяскӧд
венласьӧмӧн
чужанінӧ
бергӧдчыны
бӧр
Эска
абутӧм грек
век жӧ бур вылас
кутан надея
важ вичкоын
вежа ай
Микӧлай
Ен водзын
юрбитӧ
битӧгыд пемыд
сьӧлӧмыд быдсӧн шонавлӧ
кор эскан
Муса
ме лолала зэрӧн
помтӧм серӧн мичмӧдан лолӧс
небыдик гӧлӧс
аслыспӧлӧс мичлун
ме муна да ог мун
он мун
кольчча
воча котӧртан
котӧрта
котӧртам
вочавидзис
тӧлысьыслы тӧлыс
быдпӧлӧс рӧм
быдпӧлӧс шы
воштыны
муса
ме ӧзъя и куса
лэбзя и уся
гусьӧн виччысьӧ войнас
пемыдсӧ биыс
чардбиыс сиис
сынӧдыслы потны
сьӧлӧмсӧ сотны
сотны войсӧ
сӧдзӧдыштіс
кӧмтӧг тувччалӧ асылыс
сылы гажтӧм
кӧдзыд
ӧтчыд помасяс
ӧтчыд югдас
лун дас
дас вит виччысьны
кутчысьны да лэдзны
видзны кывсӧ
бӧръя кывсӧ
вежӧрын видзны
вочавидзны зэрыслы
шондіӧн
зарниӧн лӧставны
ставыс вунӧма
ставыс мунӧма
бырӧма кадыс
садйыс дзоридзалӧ
сёрӧдз
сӧдз да сӧстӧм
муса
да мустӧм
Медводдза
томан сайын
гажтӧмтчӧ
ичӧтик лэбач
еджыд лэбач
чӧдлач синма
кынман
висьман
верман-ӧ кутчысьны
воштысьны некытчӧ
сьӧлӧмын сотчӧ-сотчӧ
лэдзны гашкӧ
збыль лэдзны
пола
бушкола вой бӧрын
ключсӧ аддза
медводдза...
Югыд
а пемыдас эм и югыдыс
сӧмын мукӧдыс тайӧс
оз кывны
шогысла йизьыны-йизьыны
да коркӧ сывны
лача
кодлыськӧ мича чача
мырддьыны
аддзысьӧмӧдз
лунъяс лыддьыны
Вӧталӧ
сьӧлӧмын
вӧвлытӧм нэм
дзоридзалӧ
восьлалӧ
восьлалӧ
восьлалӧ
войыс
джынъя тӧлысьыс
зарниӧн лӧсталӧ
вӧталӧ
вӧталӧ
вӧталӧ
Тулыс
гора тулыс
мем шуліс енэжыс
эн шогсьы
сьыв
небыдика сывъяліс том тӧлыс
орччӧн вӧліс да эз вӧв
чӧв ланьтӧм сынӧдыслӧн
аслыссикас кӧрыс
пӧдтіс да сетіс вын
тэ авъя шонді
и гӧрдов чардби
и юмов тшын
Олӧм
вадор
нор ытваыслӧн
виччысяна кылыс
кыліс байкӧдана гысӧ
шыыс лӧнь да сӧстӧм
зарни лэбачьясӧн ӧзтӧм енэж
муса эж
и гашкӧ вежан
и он веж
и кежан туйсьыд
и он кеж
зэв ньӧжйӧ юыс мунӧ-мунӧ
а сьӧлӧмыд друг ыркмунӧ
ыркмунӧ
Эн пов
лэчыд мӧвпыд
пальӧдас ӧтчыд
тӧдса ин
а син водзын
медводдза лым да зэр
тэ войвыв сер
тэ ловъя дзирд
да куслытӧм кыа
сынӧдыс пыдӧстӧм рӧмсӧ кыӧ
вильшасьӧ-чеччалӧ
гысянь – гыӧ
ылын-ӧ
мусяньыс
кодзулыс
ӧнӧдз ог эскы
кылан
эн пов
сӧдз
ваа лов
Би
тӧрыт и талун
гожӧмыс лолалӧ арӧн
мем карын мустӧм
мем карын кӧдзыд
сӧмын ӧтчыд
из керка сайысь
гӧрд тӧлысьыс мыччысяс
тӧлысь да зэрысь
ог дзебсьы
сьылӧм да сьӧлӧм
сӧдз югӧрӧн
ломавны
ӧзйыны
югзьӧдны
Коми кыв
ме лэбач
лэба
ылӧ-ылӧ
вылӧ-вылӧ
лӧсталӧмӧн ӧзйӧ
шонді улын
бордйӧ
йӧлӧгаӧн быдӧн
кылас менсьым
мада гӧлӧсӧс
васӧд сынӧдыс
югӧрсьыс потӧ
мем кылыс тайӧ
медся мыла
да дона
Да
крепыда видзны
кутны да лэдзны
да
тшӧкыда казьтывны
сувтны да кывтны
да
веськыда шуны
кольны да нуны
да
шудаа овны
сетны да повны
да
сьӧкыда лолавны
чӧвтны да отсавны
да
топыда сывъявны
бӧрдны да нюмъявны
да
да
да
Муслун
войталӧ
йӧйталӧ тӧлыс
тулысыс кузь да гажтӧм
вашкӧдӧ меным ассьыс кывбурсӧ
бурсӧ да лёксӧ торйӧдны
сьывны да бӧрдны
муслунтӧ
пальӧдны
Эска
зэрӧн войнас
кӧтӧдас
кӧтӧдас
кӧтӧдас
ме зарниӧн лолала
лэбзьыла и уся
лэбзьыла и уся
лэбзьыла и уся
ӧзъяс
сотчас
сотчас
и кусас
и бырас
эн кор
эн корсь
гашкӧ
аски
регыд
регыд
виччыся и эска
виччыся и эска
эска
Енэж
еджыд вой
шондіа ваыс тэрмасьӧмӧн войталӧ
тувсов ытваыс мыськалӧ ловтӧ
кӧдзавлытӧм ловтӧ
сынӧдыс ӧвтӧ муслунӧн
букыштчӧм луныд
кыпыд да шуда лоӧ
медбӧрын медшӧрсӧ гӧгӧрвоӧ
а енэжыс
авъя енэжыс
вильыш тӧвруыскӧд ворсӧ
Кодзув
гӧрд саридз дорын
еджыд дзоридзьяс
сярвидзӧны
вочавидзны гораа да рама
тӧвруыс унмовсьӧма
лэбачьясыс узьӧны
сӧмын енэжын
кымӧртӧм енэжын
кельыдлӧз енэжын
пӧртмасьӧ кодзув
куслытӧм кодзув
медмуса кодзув
Майшасьӧм
кодзула зэрӧн войыс
серлӧдлӧ лолӧс
мӧд пӧлӧс серпас
ас костаныс сёрнитӧны тӧвъяс
дугдывтӧг
зарни небӧгыс гижтӧм на
ланьтӧм енэжыс кымӧрӧн
вевттьысьӧ
сылӧн сьӧлӧмыс
тэ вӧсна талун висьӧ
Кыв
визув кад
югыд кад
тэрмасигад сотчан
бергӧдчан бӧр
кыпӧдчас кымӧр
да пӧттӧдз юктӧдас тэнӧ
эн вунӧд шыладсӧ
муса шыладсӧ
да кывсӧ
сьӧлӧм вӧрзьӧдана кывсӧ
сӧдз ваа лов
тувсов зэр
да онялана сер
Лэбач
тэ повтӧм лэбач
ачыд лэбан кытчӧ кӧсъян
кӧть кор
аскӧдыд некодӧс он кор
гора сёрниясысь ӧтдор
некор он вензьы
ме помтӧг шензя
гашкӧ
мукӧддырйи повзя
повзьыла тэ вӧсна
сӧмын регыдӧн
бӧр ловзя
лэб
мичаа лэб
сӧмын
муслунтӧ
эн дзеб
Джуджыд
муса зэрӧ кор
гашкӧ коран
либӧ он кор
юыс мойдкывсӧ
ассьыс вашкӧ
ме дыр нин
эг кывлы тэнсьыд
мелі гӧлӧстӧ
полысьястӧ
джуджыд ваыд
оз радейт
Ӧтдор
асъя вой
турӧбыс зэрыскӧд тышкасьӧ
тшыг нисьӧ пӧт
курыд
шогмытӧм вӧтын
тэ меысь ӧтдор
пемыдыслӧн пом ни дор
оз тыдав
оз ыджыдав югыдыс
рӧмыдыс да сьӧлӧмтӧ
шогӧдысь кӧдзыдыс
сотӧны
Шуда
тувсов корйӧн эскӧмыд ловзяс
гуся эскӧмыд
пемыд ӧшиньын ӧзъяс би
тэ гӧрдов чардби
ми
кӧтасим
кӧтасим
кӧтасим
чим еджыд эрдын
визув ю бердын
бӧрдан да сералан
муслунӧн
олан
шуда
Тӧвру
воськовта ӧтчыд
мӧдысь воськовта
окота сьӧвзьыны лэбачӧн
кумач шондіӧн югзьӧдны олӧмтӧ
енэжад куслытӧм кодзулӧн
пӧртмасьны-дзирдавны
лӧзавны юӧн
лолавны чӧскыд руӧн
кокни тӧвруӧн лоны
Ӧтчыд
лыа берегыс буждӧ
лыа берегыс киссьӧ
пармаыс висьӧ
сьӧкыд кад
ӧтнад зэригад
кынман
кынман
сӧмын ӧтчыд
векньыд туйын
паныдалан
он ӧтдорт
колана морт
Сьӧлӧмшӧр
горзыны
овны шы ни тӧв
тэ вӧлін олӧмам
да эн вӧв
водз асыв
сёр рыт
тӧрыт и талун
ме матын
татӧн
уськӧдча вӧтӧн
войнас
асывводзнас
инас оз ӧшйы руыс
муыс кок улас лайкъялӧ
визулыс сялькъялӧ берегас
ӧтчыд
югдігас
виччысьтӧг
мунас
мунас
да оз бергӧдчы
бӧр
сьӧлӧмшӧр
Ловзьыны
куим лун чӧж
шлявгис-кӧтӧдіс зэрыс
вадорыскӧд аддзысьлӧм
кыпыд аддзысьлӧм
да торйӧдчӧм
виртӧм сьӧлӧм
коньӧр сьӧлӧм
чужанінӧ бергӧдчӧм
пашкыртчӧм бадь
садь быртӧдз повзьыны
да выльысь ловзьыны
оз позь
лолӧн чорзьыны
Гожӧм
тэ гожӧм
тэ небыд гожӧм
тӧдлытӧг чужӧм кузяыс
лэччывліс синва моль
тэ гожӧм
тэ шоныд гожӧм
лов вылад гижӧм кывъясыс
сотісны сьӧлӧмӧс
тэ гожӧм
тэ югыд гожӧм
уна воӧн чӧжӧм муслун
да радейтны позьтӧм вой
тэ гожӧм
тэ мелі гожӧм
войвыв гожӧм
дженьыдик гожӧм
Ва
вежа ва
ме зэр ваӧн
енэжсянь уся
да кӧтӧда тэнӧ
йизя
сыла
сьыланкывйыд
медся
мыла
вежа ва
ме ытваӧн
кӧтӧда тэнӧ
да ловзьӧда
польда
да косьма
дзирдалан юыд
воссьӧма
Ордым
гӧрдӧдыштӧм кыа
кадыс сувтлытӧг кыӧ
ассьыс кулӧмсӧ
нэмсӧ кыйӧ
сьӧлӧмтӧ тэнсьыд
сьӧд да еджыд
джуджыд йир
вир синваӧн
бӧрддзыны
да ӧддзыны-ӧддзыны
аддзыны югыд ордымсӧ
шуда ордымсӧ
тэланьӧ нуӧдысь
ордымсӧ
Регыд
пипу веткиӧн
олӧма юті кывта-кывта
мӧдлапӧлын киӧн ытшкан
видзьяс вывті
юрсигусь гӧгралӧ
лолыд ӧгралӧ-ӧгралӧ
ӧзйы
пӧляла
ӧзйы да мичаа дзирдав
пемыдыс
оз
оз тыдав
эн кус
сус пу дорын
аддзысьлам на
регыд
Кажитчӧ
вунлытӧм серпас
ас морт
ас ёрт
чеглӧм борд
гӧрд шондіа вой
полой вомӧн
вартча
вартча
мӧвпӧй гартчӧ
гартчӧ
вирдалан кадыд
матыстчӧ
кажитчӧ
Чӧвлун
регыд пемыдыс
лымйӧн сылас
аслыссикас тулысыс
сывъялас сьӧлӧмтӧ
да муслунтӧ ловзьӧдас
тӧлысьыс ӧтнас
сӧстӧм гӧлӧснас сьылӧ
сійӧ лэбзьылас
вылӧ-вылӧ
да усяс
чӧвлунсӧ
кылан-ӧ
Вадор
вожалӧм туй
быдӧнлӧн аслас морттуй
аслас сям
лыа вылын юксян мӧвпъясӧн
нимкодясян олӧмнас
тэрмасям-тэрмасям
да век мыйкӧ виччысям
вадорын вошласям
Бордъя
бордъя кывбурӧс
бипур дорын лыддя тэныд
шоныд саридз
ловъя саридз
кывъя саридз
сёрмӧм дзоридз да
тырмытӧм кад
дыр виччысьӧм бӧрад
тӧдлытӧг воас
ас морт
Чужан
чужанін муса
тэ мунін
эновтін
мада инсӧ
синсӧ гортыдлысь
жаль гортыдлысь
дыр нин эн аддзыв
лымйыс сыліс
да лолад эз сыв
кӧсйӧмыд бара ӧзйис
да кайис тшын йыв
чужан кыв
чужан му
чужан сикт
радейта-радейта
окота-окота аддзысьны
быд вой вӧтасьӧ
сьӧлӧмӧс нюкыртӧ
корӧ гортӧй
гажа гортӧй
Вежа
эскыны бурӧ
ловъя бипурӧ
содтыны вын
сир курыд тшыныс
синмӧс сёйис
синва войт
югыд войт
тэнад кылыд дойдіс
да эз нин и дойд сьӧлӧмӧс
вӧт али вемӧс
шуда вемӧс
керка пельӧсын
вежа морт
Аддзысьны
ылі войвылын
енэжын сьылӧ юсь
ме сыкӧд лэба
уся гашкӧ
гашкӧ ог усь
сюсь видзӧдласа
ёсь кывъя кад
вежӧрад пыр жӧ
воӧ тайӧ луныс
шуда луныс
кыкнанныс олісны чӧв
а мӧдлапӧв берегас виччысьӧны
зарниӧн пӧртмасьӧ кӧсйӧм
бордъя кӧсйӧм
аддзысьны
Шуд
йӧктыны
ме тшӧкта аслым
шыладыскӧд лэбзьыны
тӧвзьыны енэжлань
шондіыс увлань нёрӧ
ловбиыд синмӧс ёрӧ-ёрӧ
корсюрӧ рад-рад
корсюрӧ шог
ог
сӧмын
лолӧн ог
ог усь
сюсь синма шуд
Абутӧм зэр
косьтӧма ловсӧ жар гожӧмыс
чужӧмыс ыпмуніс
муніс ӧтнас помасьтӧм туй кузя
абутӧм зэр
сылӧн сёрниыс гашкӧ и востер
сӧмын весьшӧрӧ
парма шӧрӧ вошӧм сиктын
коркӧя вӧтын моз
зэв гажа
быттьӧ лолала важӧн
а неважӧн на юыс кыліс
асьсӧ ёнсьыс-ёнӧн
сӧмын
некымын вежонӧн
ставыс вежсис
Сетчыны
быд мортын
аддза тэнӧ
кыла тэнӧ
быд шыын
зарни тыын
вартча-вартча
сунан кӧ татчӧ
он мездысь
кадысь кадӧ
видзӧдла берегас
сӧмын шонді пуксигас
сетча
Олантуй
кор кыдз пу корйыс потас
да дзоридзалас льӧм
асъя лысваӧн мыссьӧм
шондіыс
сӧдз шондіыс
пальӧдас олӧмтӧ
помтӧм нимкодьлун
овмӧдчас сьӧлӧмад
тэнад туй вомӧн
зэрыс оз сувт
лолад сӧдз ёльыд
муслуна ёльыд
оз весьшӧрӧ визувт
шыльыд да
мольыд
олантуй
Здук
кыпыд здук
дона здук
вуджам
сук веретя пыр да
сён вомӧн
асьтӧ кылан томӧн
бипурыслы кусны он сет
кодлы медсьӧкыд свет вылас овны?
Визув
дженьыдик гожся вой
тэ рытыв-вой тӧлӧн
олӧмам волан да эновтан
юыслӧн рӧмпӧштан кодь
веркӧсыс аддзывлас ставсӧ
визувсӧ он сувтӧд
ог тӧд
кытчӧ вайӧдас сійӧ менӧ
венны либӧ сетчыны
мунысьысь водзвылын
кольчыны да матыстчыны
тӧдса яглань
Вына
еджыд да сьӧд
ме тӧда тэнӧ
да буракӧ ог и тӧд
и тӧдны ог мӧд
тшына сынӧд
да помтӧм вой
омлялысь вой тӧв
олыштны чӧв
да куим пӧв
вынаджыкӧн
лоны
Эска
грымакылӧ муыс
сынӧдыс васӧд
муслуна туйясӧд
восьлала
восьлала
помтӧг восьлала
корся тэнӧ
эскӧй кӧть энӧ
ылала и уся
гусьӧник
эска
кодӧскӧ пӧръявны
либӧ асьтӧ
пасьтӧм зэрыс
тӧдӧ кутшӧм
кӧдзыд овлӧ
кор шондіыс
дзебсьывлӧ
Борд
еджыд лымйӧн
гожся лымйӧн
пырзьӧдан
бӧрдан и сералан
сиралан бордтӧ
лэбзьыны он вермы
сӧмын
регыд зэрмас
мездас ловтӧ
повтӧг журӧбтан
енэжӧ
муслун
чужӧ
Йир
веж нӧрыс
гажа нӧрыс
вӧрыс тӧдтӧм
кадыс пӧдтӧ
оз коль вын
тшын сора олӧм
доналӧм шондіыс
сёйис лысвасӧ
югыд асыв
сывъялісны тӧвъяс
да тойыштісны
йирӧ
джуджыд йирӧ
шуда йирӧ
Сьывны
войталӧ
йӧйталӧ тӧлыс
тулысыс кузь да гажтӧм
вашкӧдӧ меным ассьыс кывбурсӧ
бурсӧ да лёксӧ торйӧдны
сьывны да бӧрдны
муслунтӧ
пальӧдны
Лача
вувзясьӧ бушколыс
яр
тулысын ар
мем жар и кӧдзыд
кӧдзыд и жар
мӧдар берегыс вошӧма
ылӧ-ылӧ
кельыд асылӧ
лунвылӧ
лэбзяс бобув
еджыд бобув
визув гӧрд юыс йизяс
а биас эм лача
чӧдлач рӧма вой
кӧдзыд войт
дойдӧ
да оз нин и дойд