Тувсов
Гажа шор моз сёлькӧдчысь сёрни.
Тувсов енэж, кунӧра зэр.
Талун водз на да аски сёр нин,
Ловъя муслунлӧн гыа сер.
Зарни биӧн югъялысь асыв.
Еджыд вичко, шондіа вӧт.
Войыс рытыслы лоис асӧн,
Лолыд шаньлуннас эз на пӧт.
Лым
Тувсовъя юыс гызьӧ,
Пыжыдлӧн нэмыс кузь.
Мӧдлапӧв вуджны позьӧ
Да кодзулыс эз на усь.
Шондітӧм войыд кӧдзыд,
Лолыдлӧн руыс пым*.
Енэжыс мусмас ӧтчыд
Да усяс виччысьтӧм лым.
*иж. диал. «горячий»
Пыдӧстӧм
Сӧнікасьӧм пыдӧстӧм лов,
Шутлялӧ тувсов тӧлыс.
Скӧр гыяссьыс шудыд оз пов,
Войыслӧн сьылӧ пӧлыс...
Виччысьны
Тувсовъя йирмӧг сер,
Вералӧ юад ваыс.
Вельмӧм тӧвныра шер –
Кӧтасьӧ талун ставыс.
Дзирдалысь рӧма вӧт,
Воштысьӧ вӧрас ёльыс.
Сьӧлӧмыс эз на пӧт,
Виччысьны сӧмын кольӧ.
Бурӧ
Зарни тулысыс сьылӧ,
Шонді югӧрыс яр.
Пышкайыд лэбис ылӧ,
Тӧв бӧрын оз ло ар.
Войвыв турӧбыс дурӧ,
Тундра эшкыныс лӧз.
Эскыны помтӧг бурӧ
Вӧзйыліс пӧрысь йӧз.
Ыджыд-ыджыд
Муыс енэжыскӧд ӧтлаасьӧ,
Лэбачыслӧн сьылӧмыс мича.
Воча тӧвзьыны рытыс тэрмасьӧ,
Сӧмын чӧв-лӧньсӧ талун видзӧ.
Юыс саридзыскӧд ӧтлаасьӧ,
Шондіыслӧн муслуныс джуджыд.
Кыаыс, гӧрд, вӧтасьӧ-вӧтасьӧ,
Сьӧлӧмыс сылӧн ыджыд-ыджыд.
Саридз
Кельдӧдӧм кыа, виччысьтӧм кыв.
Сӧстӧм енэжыс сувтлытӧг мойдӧ.
Вадор кӧртӧ эг кыв, дыр нин эг кыв.
Тӧвся саридзыс муслуннас ойдӧ.
Тӧв
Эзысьӧн волялӧ вӧрыс,
Лэбачӧн лолалысь чӧв.
Тӧлыслӧн вунлытӧм кӧрыс
Мусаммис уна пӧв.
Эскӧмӧн лӧзалӧ муыс,
Гыӧрӧн вевттьысьӧм лов.
Еджговат, надзӧник руыс
Шондісьыс оз на и пов.
Йирмӧг
Тӧлыс вынсялас рытнас,
Сынӧдыс сотӧ.
Тӧлысьыс сьылӧ ӧтнас,
Быттьӧкӧ потӧ.
Йирыс сывлытӧм, кын на.
Турӧбыс венӧ.
Йирмӧгыс юксьӧ выннас, –
Вермалӧ тэнӧ.
Кусны
Лым чирйӧн сылас луныс,
Кӧдзалас сьӧлӧм би.
Турӧбыс тэлань мунӧ.
Келалам вӧрӧд ми.
Торпыриг лэбӧ лолыд.
Му пасьта оз сюр ин.
Енэжыс кусны полӧ.
Медбӧръя кусӧ кинь.
Колана, гашкӧ, ковтӧм?
Чегласьӧм еджыд борд.
Зумыд да быттьӧ овтӧм –
Ичӧтик, муса горт.
Турӧб
Пырзьӧдӧ тӧлыс лолӧс,
Муслунсӧ юыс оз видз.
Небыдик, тӧдса гӧлӧс –
Сьӧлӧмам кылыд оз сидз.
Койыштас вежа ваӧн,
Ӧзтылас неыджыд сись.
Еджыдсӧ мыськан саӧн.
Турӧбыс талун оз вись.
Коркӧя югыд кӧсйӧм,
Лэбачӧн воштысьӧм кад.
Кыаыс кутны вӧзйӧ
Да енэжыс абу рад.
Сылас
Зарниӧн ворсӧ войыс,
Енэжыс кодзулӧн тыр.
Тӧкӧтьӧ бурдас дойыс,
Сӧмын ӧдйӧ оз быр.
Пӧръялас лымйыс тэнӧ.
Вильшасяс тӧлыс, оз?
Кӧдзыдыс асьсӧ венӧ,
Бӧрдӧ сералігмоз.
Велалас кадыс лэбны,
Тӧлысьыс талун скӧр.
Некодысь ловтӧ дзебны,
Сьӧлӧмыд сылас бӧр.
Вочакыв
Кодзула зэр улын лолыд кӧтасьӧ,
Лэбалӧ сьыланкыв.
Тӧлысьыс мыйкӧ вӧтасьӧ-вӧтасьӧ,
Виччысьӧ воча кыв.
Эскыны
Дзоридзыс шондіыслы эскӧ,
Кӧть мукӧддырйи эськӧ
Кымӧрыс койӧ васӧ.
Зарнитӧм, букыд асыв.
Дзоридзыс тӧвруыслы эскӧ,
Кӧть мукӧддырйи эськӧ
Жарысла, мусаӧй, пӧдӧ.
Дзебсьыны кытчӧкӧ мӧдӧ.
Дзоридзыс зэръясыслы эскӧ,
Кӧть мукӧддырйи эськӧ
Югӧрыс корсӧ сотӧ.
Муыс кок улас потӧ.
Дзоридзыс эскӧ.
Век на эскӧ.
Кӧть эськӧ...
Эскӧ...